| Si
Palui Cerita Bahasa Banjar |
= "Bubuhannya sudah parak tulakan ka Makkah sana," ujar Palui.
+ "Tahun ini biarpun krismun nyatanya tatap haja banyak nang tulakan," ujar Garbus.
= "Kalu sual baibadat wan ba-amal kada tagantung wan krismun Bus ai tapi tagantung wan niatnya," ujar Palui.
+ "Biar baniat kalu kada baduit kada kawa tulak jua Lui ai," balas Garbus.
= "Tapi sabaliknya Bus ai biar banyak baduit, sugih, harta batuyuk tapi kadada niatnya maka kada kawa tulak jua," ujar Palui.
+ "Ooooo......... jadi nang paling baik adalah ada niat dan ada duit," ujar Garbus manyimpulakan.
= "Balum tantu jua Bus ai, ada duit, ada niat tapi kalu balum giliran dikiyau Nabi Ibrahim maka balum kawa jua tulak," ujar Palui.
+ "Ikam samalam kaya apa Lui?" ujar Garbus.
= "Aku samalam syukur alhamdulillah takana dijamak jibril," ujar Palui mangalak tatawa.
+ "Aku samalam ada mandangar tuan guru babacaan bahwa di Makkah itu kita harus rukun, harus jangan emosi, jangan bahual, jangan bakalahi, bujurlah Lui?" ujar Garbus batakun.
= "Bujur banar Bus ai, laki binipun jangan sampai bahual basasarikan apalagi bakalahi, ada cuntuh nang baik Bus ai," ujar Palui.
- "Kaya apa kisahnya Lui?" ujar Tulamak umpat batakun.
= "Wayah itu ada laki bini basasarikan, bakalahi sampai cacarancang basasahutan panderannya. Manyupanakan banar kadangaran jamaah nang lainnya," ujar Palui.
+ "Lalu kaya apa ma-ampihinya, kawalah Lui?" ujar Garbus.
= "Karna suara laki bini itu banyanyaringan, kadangaran ulih tuan Syech nang ampun pondokan. Imbah ditakuni tuan Syech, napa masalahanya tanyata hanya gara-gara tasalah manukar korma," ujar Palui bakisah.
- "Lalu kawalah tuan Syech itu mandamaikannya," ujar Tulamak.
= "Tuan Syech itu malah sarik, lalu laki-bini nang bakalahi itu dibawanya ka-atas loteng nang di Arab ngarannya sutoh. Di sutoh itu ada kamar husus, lalu laki-bini tadi dikurungnya, dikuncinya matan luar," ujar Palui.
+ "Lalu imbah dikurung saharian samalaman itu ampihlah laki-bini tadi bakalahi?" ujar Tulamak.
= "Urang Arab dasar pintar bisa mahalalkan nang haram, dan bisa mandamaiakan laki bini nang bakalahian," ujar Palui.
+ "Kaya apa caranya Lui?" ujar Garbus.
= "Sakalinya imbah kaluar matan kamar di sutoh itu, laki bini tadi rukun banar, salihum-lihum pina basasayangan banar kaya hanyar kawin. Kulihati nang bini pina basah rambut habis mandi baisukan," ujar Palui mangalakak tatawa.
+ "Haaha....hahaaa....," ujar Garbus wan Tulamak taimbai tatawa karna paham bahwa kamar sutoh itu bukan kurungan tapi adalah wadah panyaungan. emhati
updated: Friday, January 28, 2000 11:24:35 AM