T a p a l e u k

Iko olimpiade di Mongolia... "MA'ANG e.....beta ni bingung. Orang bilang katong orang En-Te-Te ni salalu yang son bae deng son enak samua. Padhal katong pung ana-ana ni jang kira do. Dong ju bisa berhasil di tingkat nasional. Sakarang lai ada yang mo pi iko olimpiade fisika di Mongolia." Ama Tobo baomong sandiri di bawa katapang. Ini tampa paleng ena kalo dong minom laru.  Pokonya kalo su datang dia pung taman dong, ito dunia dong pung milik su. "Puka ra'a, ko lu ni. Satiap hari kalo lu baca itu koran dong lu musti komentar na. Farek di situ do. Lu pikir nanti, kalo lu komentar ada orang yang mo toe na. Satiap hari katong bagini sa. Lebe bae katong ni urus katong pung parut, urus bini ana. Jang pi tasibu deng itu barang dong. Itu urusan pamrenta dong." Metu yang ada dodo kupas kacang langsung sambung. Tau dia pung taman satu ni paleng alergi na kalo omong yang manyangkut pamrenta pung urusan. "Neu, be paleng suka sang lu. Yang song parna maju-maju tu yang bagini ni. Satu harap satu, satu tunggu satu. Pantas katong pung idop dar dulu-dulu karna bagini. Son saling mandukung. Nanti bar kas sala ini, itu. Bagini Bu, kalo katong mo baruba, katong ju harus kas pandapat, kas masokan. Jang iko lu pung ego." Ama Tobo kas skak dia pung kawan minom. "Ia be tau. Ma kalo lu omong son ada yang dangar karmana. Itu sam saja deng, lu tapuk sabala tangan. Son nyambung." Metu pake istila ana muda dong. "Itu su kawan. Beta ju satuju, masa katong dar dulu bagini tarus. Sakarang katong pung tugas tu, harus kas hilang ini pikiran ini. Supaya katong bisa maju. Katong harus barpikir pi dapan su, jang tole tarus pi balakang." Ba'i Ndu yang ada piko deng lalapak bar ais jual ikan ju sambung na. "Caranya karmana?" Metu kas tanya lai. "Aue lu, pake tanya lai. Pikir, introspeksi diri, apa yang su lu buat. Ma kalo satiap hari, lu hanya dudu minom laru, ais lu kas komentar, karmana bisa mo barubah. Sakarang saatnya orang karja. Son usa lai pake baomong banyak, pake saminar, semi loka, pake rapat ini itu. Samua hanya kas buang doi sa. Lebe bae katong mulai balajar dar pangalaman, sabalumnya. Sakarang katong parbaiki. Sakarang ada pilkada gubnur. Katong harus pili orang yang batul-batul tidak banya omong. Dong pung tugas tu karja untuk katong. Bukan dong hanya dudu omong banya. Kalo ada calon pamimpin yang hanya baomong banya jang pili dia." Ba'i Ndu mulai kas kampanye. Tau to baptua kalo urusan kampanye juara na. "Beta kalo yang su maso ke politik be son mo ambel lai. Katong sakarang omong ini ana dong yang ada mo iko olimpiade. Katong harus bangga deng ini ana satu dar Kupang Tengah ni mo pi iko di Mongolia. Makanya ini ana yang mo iko olimpiade di tingkat nasional nanti ju harus ada motivasi. Kalo dong pung senior taon-taon kemaren hanya dapa perak deng parunggu, sakarang harus tingkatkan untuk dapa emas.  Dengan dapa emas ini, katong pung nama daerah yang selalu jelek tu, mungkin bisa uba. Orang bisa tahedek deng katong. Biar dong bilang son bae, tape ju ada dia pung bae ju." Ama Tobo kas komentar. "Batul e, Bu.....Sakarang katong pung pamrenta daerah dong tu jang hanya baribut mo beli oto dinas dong. Lebe bae dong bantu ini ana dong dana buka laboratorium satiap sakola. Supaya katong pung ana dong bisa berkompetisi. Beli mobil lebi mahal darpada dong bangun itu tampa-tampa balajar untuk ana dong" Metu su iko-iko kas komentar. Samoga sa (apolonia matilde dhiu)