T a p a l e u k

Mo jadi tim sukses....  AMA Tobo faloit-faloit di depan dia pung ruma. Tua ke enjoi mati pung karena su karja abis deng dia pung maitua. Jang pikir laen ooo. Dong laki bini tu karja bakti bersikan ruma deng halaman. Su dua bulan ni dong dua pi kampong urusan adat. Apalai lama son pi.  Kelu dong basenang mati karena Tobo, Ina Feok deng ana dong pulang ko pasang lilin di orangtua pung kubur. Kamudian dong samua bakatumu brapa lama bagitu. Tau toooo. Kelu dong potong babi deng ayam ko bekin adat kas masok pi ruma adat.  Salama di kampong dong bacarita banya. Malam hari pas dia bakumpul deng kelu dong, Tobo bariwayat waktu masi kici dia pi marantau. Kamudian sampe katumu dia pung bini sakarang deng kas lair ana dua orang. Dia hanya mo kas ena mulu sa.  Ma pas carita dong mulai tap tuak puti. Pokonya ini kali Tobo mo makan makanan kas kampong pung. Dia ju kas abis itu tuak puti deng makan ikan sembe. Tobo pung basudara dong ju bekin lawar tomat deng kelapa parut, tamba deng lombok sadiki. Dia ju carita lompa-lompa. Tarakir dia bilang sakarang ni mo pili gubernur deng bupati dong.  "Beta kas usul kalo pili gubernur tu cari ketong pung orang. Kapan lai ketong pung orang jadi gubernur kalo ketong son pili," Ama Tobo omong sambel angka glas ko tap kas abis itu tuak puti. Tartau su glas ke brapa. Mata ju mulai balari sabarang. Dasar bagatal, Ama Tobo omong sambel maloi kalo ada harim tenak dong lewat di depan ruma. Dia ju basangaja batok kras supaya itu harim dong bisa lia sang dia. Kalo ada yang lia na tau to Tobo pung gaya. Tua langsong batendes mata na deng sembur asap roko. "Kalo bagatal lia-lia dolo. Ini di kampong. Jang bekin hal oooo. Ma beta mo tanya sang lu, sapa calon kuat ketong pung gubernur," Satel umpan Tobo. "Woooow.. banya skali. Ada yang bilang Gaul na, Fren, Tulus deng masi banya lai. Sakarang ketong lia dolo. Ada ketong pung orang ko sonde," Tobo su manyaot. "Ini yang mo beta omong sang lu. Son dia pung jaman lai kalo ketong pili orang dari sini. Pili pake ini," Satel omong sambel kastunju dia pung testa. Dia bilang sakarang orang maken pintar. Dong son mo lia lai itu orang dar mana lobang. "Bu jang bilang bagitu. Jao-jao hari samua orang bilang bagitu. Ma kalo su deka dia pung waktu, nanti lari pi sana. Orang nanti mulai omong itu calon dari mana, ada doi ko sonde deng lebe lai mulai omong agama. Dan itu tarjadi tiap kali pilkada," Kawasa potong. Dia bilang, kalo omong politik tu seperti itu. Politik tu sapa tipu siapa na. Politik tu bagemana cara menjatukan lawan sebla. Bagemana strategi untuk memenangkan pertarungan. Politik tu cara yang orang pake untuk menang biar deng cara kurang ajar. Seblom tenga lama, Tobo kestau bawa di kota sana dia sebage tim sukses sapa pung ko. Dia mulai bacarita dong pung pakaneok. Tua kakaluk ju ahernya kestau kalo dong datang pi kampong tu mo ajak kelu dong ko pili dia pung jago na. Ternyata samua di kampong ju su masuk tim laen. Dengar bagitu Tobo puku testa deng langsong bongkar pi tidor. Esok dong samua pulang kota. Lu kira orang kampong sana muda kana pangaru ko? Dong ju jago maen politik. Kacian... kacian. (thomas duran)