T a p a l e u k

Targantong Angin ITU jalan raya tu maen sesak trus. Oto, bemo, sapeda deng motor ju samua tapo'a di itu jalan. Ama polisi dong ju ke su pamalas kastau warga dong. Ini hari kastau, besok jalan su baek. Samua tartib. Ma kalo lewat dua hari samua su kambali pi partama. Sabarang deng kalo lia ke orang yang son tau aturan lai. Mangkali ketong cocok tenggal di kampong. Ini yang bekin ketong maken hari ma maken jalan pi balakang. Beda kalo orang yang mo maju. Dia son mo farduli. Semangat nomor satu deng tetap pake dia pung otak jarni. Sama deng sakarang. Samua orang pasti omong sapa yang mo jadi boss di ini daera. Kalo mo lia ju samua orang ju ke son talalu jalas. Omong kapantingan samua. Ada yang omong bagini ma dia pung maksot ada lari pi jao. Omong a ma dia pung arti de ato sampe zet. Jadi son jalas. Abu-abu samua. Yang lebe bekin panas tu samua mulai omong suku, agama deng etnis. "Jang coba ganggu sang beta eee. Sakarang be mo lia sapa lebe kuat. Sapa yang pung strategi bagus jadi boss di ini daera. Jang sampe son ada. Jang sampe samua hanya mo bekin kaco sa ini daera," Ama Tobo mulai boto-boto. Dia pung kawan dong samua ju ada. Ma belom ada yang kas tanggap. Tobo ju bilang sakarang ni samua orang jago omong politik. Padahal jao hari hanya urus paklaru deng potong daging se'i. Samua ju jadi kapala sapulu. Tau to? Dia pung arti tu ini sakarang omong laen, sabantar laen deng esok lebe laen lai. Kamudian kalo pi katumu orang dong ju omong laen ma dia pung arte ju laen. Jadi mo raba sapa ju jadi susa mo mati. Mo bilang ini ketong pung orang ju belom tentu. Tagal apa karena samua mangaku sebage tim sukses. Ma coba palan-palan iko, nanti dia bekin laen samua. Kalo hadapi orang kapala sapulu ju ketong musti pake ilmu kapala sapulu. Karmana dia pung cara tenggal susun dia pung cara sa. Mangkali parlu balajar ilmu mozat ato ilmu rote ato yang karmana, tersera bu.  "Kalo beta lebe bae, ketong urus ketong pung karja sa. Jang tarpangaruh deng orang laen. Kalo tarpangaruh nanti sama deng jadi dahan pohon sa. Targantong angin. Bagitu trus," Bai Ndu ahernya buka suara. "Kalo mo idop baek musti bagitu. Longgar. Iko sana deng iko sini. Karna deng bagitu orang senang deng ketong. Samua jadi simpatik. Itu ju bisa rejeki. Dolo, kalo orang mo cari karja di Jawa musti bekin bagitu. Iko kagiatan di gareja ato masjit deng laennya. Kalo su bagitu orang kaya dong lia trus nanti kas kerja ketong di dong pung perusahaan," Pe'u angka suara. Sampe di situ, samua orang ke son ada dia pung jalan kaluar. Samua batahan deng jalan pikiran masing-masing. Samua puku dada. Mau bilang sala ju samua sala to. Mangkali ini kata pas supaya son ada yang tarsinggung. Ju supaya son ada yang bilang lebe apa ko. Bagitu kira-kira bu. (thomas duran)