T a p a l e u k

Jang Bua Mulu Babusa AMA Jabok deng Ama Tebo pung biasa sore-sore dudu di bale- bele. Dong dua minom ambe kopi deng maale kue pisang trus bacarita. Ama Jabok buka mulu partama ko baomong deng dia pung kawan. Dia bilang, sakarang ni samua orang di kabupaten di eNTeTe omong politik. Dong ju batasibu mau mati. Dong su abis bakonco parte, andia ko sakarang dong pung calon ada yang su lolos iko pilkada. Dong pung kapala otak bapikir mau mati sa. Ama Tebo, dangar dia pung kawan omong, anggo-anggo kapala.  "Itu dia pung nama batasibu politik," Ama Tebo sambong. "Lu, dangar be kastau sang lu. Sakarang ni, dong pung tim sukses mulai pi deka rayat dong. Ju dong son lupa, barayu deng bajanji ponu mulu. Sampe mulu dong babusa dong son rasa. Ma andia, dong pikir rakyat dong son tau hal dong pung maksud."  "Batul su ma," Ama Jabok, manyao ambe Ama Tebo pung omong. "Dong pikir rakyat sakarang ni, son tau politik lai. Kacian de lu, ama Tebo, " Ama Jabok sambog ABG dong pung bahasa.  "Nanti kalo dong pung tim sukses datang kas ketong apa sa, katong tarima sa."  "Ko kanapa tarima?" Ama Jabo tanya dia pung kawan. "He, katong son usa talalu bajual mahal deng talalu munafik. Katong ni orang kici, su miskin lai, kanapa masti tolak. Lu musti tau diri. Ini kesempatan bae, ketong dapa gratis. Nanti kalo, dong pung jago su nae pi karosi pajabat, dong son toe katong lai. Dong pung janji waktu kampanye, sonde ada yang dong buat." "Bagitu ko?" Ama Jabo tanya lai. "Lu su tua mofak bagini, selama ada pilkada lu pi mana? Ente ke son tau sa. Biasa, tap laru to! Beta son pusing deng itu calon dong. Sapa sa mau nae jadi gubernur nae pi su. Katong urus idop masing -masing, kanapa musti pusing deng dong? Dar dolo beta idop bagini, sonde ada pajabat dong datang lia. Ko orang kici na. Mana dong mau toe?" Ama Jabo kastau ama Tebo.  "Beta kastau sang lu," Ama Jabo, mulai kas jalas dia pung kawan. "Nanti itu tim sukses dong, kalo su mulai parhitungan suara pilkada dong pung pikiran mulai bacuriga banya. Apalai, dong pung jago son tarpili. Dong nanti bakalai harbabiruk. Kalau lia ambe dong pung lawan politik, ke mau talan sa." Ma yang lebe penting tu samua jaga ini daera. Jaga ini ruma eNTeTe. Kalo mo kas rusak tu gampang sa. Ini banya orang yang son mangarti. Lebe banya inga diri. Kalo kala na tenang su to. Ko masi mo cari hal lai. Inga ju kapentingan yang lebe luas, trus musti ju mangarti parmaenan di tampa laen yang sakarang ada bawa pi sini. Ama Tebo ju bilang lai. "Sakarang banya orang yang su mabok. Omong politik sebarang. Su sambong sabarang. Kalo omong lawan politik pasti sa omong jelek samua. Orang dia pung masa lalu. Bilang pancuri doi na, bagatal deng parampuan na, deng masi hanya hal laen. Kalo mo lia jerni hanya mo cari hal sa. Ma dia pung nama politik jadi son soal. Ko sabantar ju jadi dingin." (reddy ngera)