T a p a l e u k

Jang Babakar Padang Lai KALO mo lia, sakarang ni banya orang yang son mo paduli deng lingkungan. Lingkungan yang ketong maksot tu lebe pada ekosistem alam. Sakarang ni coba lia sa di ini kota. Orang ju su mulai bakar sabarang sa. Coba kalo lewat pi walikota sana, pas di blakang kantor Golkar tu. Ketong musti sili dolo karena api su manyala sabarang.  Jujur sa ini menyangkot ketong pung perilaku. Kalo tiap taon masih sa bagini, ini dunia nanti siap sa tanggalam. Na bagemana ketong guga samua orang supaya idop lebe baek. Idop deng tatap jaga ini alam. Coba lia sa. Kalo tana su gersang, trus mo tanam ju pamalas ketong bisa rasa panas mo mati.  Ini tugas samua orang. Di ruma ketong ju musti kas ingat samua. Ana-ana dong, bini, laki deng samua orang musti sadar su. Kalo sonde na kermana. Sapa yang mo ketong harap? Ini sebenarnya musti bekin ketong supaya lebe cepa sadar. Inga kambali untuk apa ketong idop deng masa depan ana cucu dong. "Sakarang ni samua orang omong tentang lingkungan idop. Itu es samua su mencair di kutub sana. Kalo son cepa tangani ketong pung dunia bisa tenggelam," Ama Tobo omong plan deng dia pung bini Ina Feok. "Na dia pung cara karmana supaya ketong son binasa," Ina Feok tanya dia pung laki Tobo. Tobo ju mulai kas jelas. Dia bilang caranya tu tanam deng tanam trus. Itu tanaman dong nanti serap itu panas. Kamudian jang lai bakar sabarang, potong pohon deng masi banya hal laen," Tobo su ke apa ko. Ma itu penjelasan baptua ju benar. Orang pintar dong bilang musti ada tindakan cepat. Kalo sonde na ketong samua siap tarima karena son ada kakuatan laen yang bisa kas hadang itu air laut. Kalo di ruma su bagitu, su mangarti na ketong harap dewan deng adi wartawan dong mangarti deng bae. Kalo dong mangarti artenya pas tulis di koran tu son kas bingung warga dong. Samua yang adi wartawan dong batulis tu jerni. Kalo tulis bae-bae deng pake kalimat yang sederhana tu bekin samua orang cepa tangkap dia pung maksut. Kalo son mangarti ju baca to. Ato iko pelatian. Sakarang ni banya pelatian tenggal mo iko di mana. "Be ju dengar bilang sakarang adi wartawan dong ada iko latian tentang lingkungan idop di Kupang ko," Bai Ndu yang baru datang su batanya po Ama Tobo. Karena pamalas sa, Ama Tobo ju anggok. Ko dia rasa son talalu pas kalo mo kas jelas pi orang yang son jalas. Kanapa sampe dia bilang bagitu. Ini tagal Bai Ndu tu suka bekin onar di lingkungan. Suru mo pi tanam, tua bangon lari pi kampong sabla. Kalo su bagitu na dia mulai cari hal. Itu padang rumput tu dia bakar sebarang trus ajak ana muda ko bakejar rusa deng babi hutan. Ini yang dong bekin amper tiap taon. Ma karena hukuman panjara berat bagi dong yang suka bakar padang, mulai ini kali baptua minta ana muda dong jang bekin lai. (thomas duran)